ناهد السباعي: "الفن مش لازم يغير قوانين.. بس يقدر يغير تفكير الناس"

في أجواء فنية نابضة داخل مهرجان الإسكندرية للفيلم القصير، تحدثت الفنانة ناهد السباعي خلال إحدى الندوات عن دور الفن في المجتمع، مؤكدة أن العمل الفني مش بالضرورة يغير قوانين، لكنه ممكن يفتح النقاش ويغير سلوك الناس.

وشددت السباعي  على أن السينما والفن مش هدفهم تقديم دور معين للمرأة أو الرجل، إنما الأهم هو تسليط الضوء على مشاكل مجتمعية واقعية، قائلة: "مش لازم نقول إن الفيلم دا دور الست فيه كذا، إحنا بنعرض قضية، وبنحاول نأثر في الوعي، زي أي واعظ بيقدم رسالة".

وكان من المفترض أن تشارك الفنانة انتصار في الندوة، لكنها اعتذرت بسبب ارتباطها بتصوير عمل درامي جديد.

فعاليات مهرجان الإسكندرية للفيلم القصير، اللي انطلق سنة 2015، مستمرة لحد 2 مايو، وبتقدم عروض أفلام قصيرة من مختلف دول العالم، بالإضافة لورش عمل وندوات بتنقاش قضايا السينما وبتدعم المواهب الجديدة.

المهرجان بتنظمه جمعية دائرة الفن وبيُقام بدعم من وزارة الثقافة وهيئة تنشيط السياحة وعدد من الجهات الراعية زي نيو سينشري وباشون للإنتاج الفني.